Í lok apríl síðast liðnum fóru kennarar leikskólans til Danmerkur í námsferð.
Allt frá því að síðustu námsferð okkar erlendis lauk í apríl 2017 var hugur í okkur að fara aftur að stað fjórum árum seinna. Covid-19 setti örlítið strik í reikninginn og þurftum við að falla frá fyrri plönum um að fara í námsferð árið 2021. Árið 2021 var stofnað teymi sem sá um að skipuleggja ferðina okkar og tókst þeim vel til.
Teymið lagði heilmikla vinnu í að finna út hvert ætti að fara og var það endanlega ákveðið í nóvember 2023 að haldið yrði til Kaupmannahafnar. Ferðaskrifstofan Visitor ásamt Berlínum sáu um allt skipulag og bókanir á heimsóknunum og þökkum við þeim ofsalega vel fyrir.
Aðfaranótt miðvikudagsins 24. apríl var komið að því að 37 starfsmenn Jötunheima lögðu af stað í námsferðina. Tilgangur ferðarinnar var að kynna sér skóla í Danmörku og kynnast menntakerfinu og leikskólaumhverfinu í Danmörku. Eins langaði okkur að vita hvernig nemendur færu á milli skólastiga þar sem skólarnir voru ýmist fyrir börn 1-3 ára og svo 3-5 ára. Ásamt þessu langaði okkur að kynnast hvernig Hovedbibliotek København hefur útfært bókasafn sitt og aðstöðu sína með það í huga að auka lestrar- og bókaáhuga barna frá unga aldri. Ásamt þessu var einnig mikill áhugi starfsfólksins að fá fyrirlestur um jákvæða sálfræði og hvernig við getum aukið lífsgleði okkar í leik og starfi og fengum við fyrirlestur frá Töfrakistunni í Jónshúsi.
Þá er ferð eins og þessi mjög gott hópefli og ekki síður mikilvæg fyrir þær sakir.
Hér má finna skýrslu ferðarinnar. Námsferð Jötunheima til Danmerkur 2024- Skýrslan